E en contra de todo pronóstico fomos nós as primeiras convidadas da casa da avoa Presenta, as primeiras persoas en prender o lume das chemineas para quentar as estancias dese lugar.
A Rigueira, a nosa aldea, permitiunos sentir e vivir o confinamento rodeadas de espazo exterior infinito e naturezas diversas.
Antón namorou do lagarto de papo azul que moraba na fonte ao carón da casa, e estarmos preto do cano da auga permitíalle espialo a todas horas.
Desde A Rigueira, Antón compartía coa mestra e coas compañeiras e compañeiros da clase debuxos e fotografías de ras e lagartas. Avanzaba a primavera e, con ela, a chegada das primeiras vacalouras do ano.
Vacaloura e Xurela tamén é posible grazas ao traballo de deseño e ilustración de Diego Nuñez e ao apoio de todas as persoas que, desde o primeiro día, compraron os nosos produtos. Esperamos que che guste!
Fai xa case tres anos a vida cambiou para todas: para a xente miúda e para a entrada en anos, para a xente das aldeas e para a das cidades…
